أنا يمه غلطت ولاني اول واحد غلطان ..وش الدبرة وحظي صار قفل ضاع مفتاحه!!

يعين الله يادنيا تسـوق ايّامهـا الأحــزان
يعين الله .. وانتي مثل قفـل ٍ ضـاع مفتاحه

يعين الله ... وجروحي لها في كلّ وقتٍ شـان
كذوب اللي يقول ان الزمن بيـداوي جراحه

سقى الله يوم انا يمـّه غرير ٍ يزعج الجيران
سقى الله يوم انا طفلٍ يصج البيت بصياحه

سقى الله يوم كان اقصى طموحي .. لعبة الدنان
نهاية يومي المغرب ... واخاف الليل واشباحه

سقى الله يوم انا البس بشت ابوي وثوبه القيطان
واقلد كلّ شيٍ فيه .. حكيه .. جدّه .. مزاحه

واشيل المسبحه مثله ليا هوجس وهو سرحان
بيشعر ...واحسب ان اللي عطاه الشعر مسباحه

سقى الله بيتـنا ذاك البسيط مشقق الجدران
شجـاع ٍ يهزم الغدراء … بقنديله ومصباحه

تكحِّلنا القناعه .. لا طمع .. لا هم .. لا حرمـان
واذا جاء الليل تكفينا ... ثلاث اخوان .. طرّاحه

جميع الذكريات اللي غدت في قفرة النسـيان
يحـاكي حلوها عبره ... بموق العين سبّاحه

خذتني غربـةٍ عنوانها ... غربه بلا عنوان
ابي عقب التعب راحه ... لقى فيني التعب راحه

رجعت اليوم مثل اللي رجع عقب القنص خسران
غدا طيره وجاء يسحب سلـوقيه وملواحـه

وروح ٍ تايبـه كانت تبي لذنوبـها غفـران
خطـاي انّي كتمت اسرارها بعيـون بواحه

تقولين المطر ماهـوب … يمّـه دايمٍ هتان
اجل معذور قلبٍ في همومه ضاعت افراحه

انا يمـّه غلطت ولاني اول واحـدٍ غلطان
ابونا آدم من الجنه خرج باسباب ... تفاحه

خذلك الوقت فيني .. ماخذلتك ياأعـز انسان
وش الدبره ؟ وحظي صار.. قفل ٍ ضاع مفتاحه

ابيات روعه

وكلمات جميلة ..

الف شكر لك اخوي هيبة على الموضوع الرائع جدا

ننتظر تميزك وابداعك

<< الي الامـآم

العفو اخوي خاطف

مشكوووور على مرورك

الله على الكلمات الرائعه
بجد مؤثره
تقبل مروري

كلمااات روعه
ومبـــــدع ياهيبه ملك
تقبل مروري

امبراطوره العشق كتب:

الله على الكلمات الرائعه
بجد مؤثره
تقبل مروري

مشكووره على مرورك

تحياتي

@ مســـــــرع @ كتب:

كلمااات روعه
ومبـــــدع ياهيبه ملك
تقبل مروري

الاروع انت يا قميل